BADRINATH KASTALU

బద్రినాథ్‌కు బారెడు కష్టాలు

అల్లు అర్జున్‌ నటించిన భారీ బడ్జెట్‌ చిత్రం ‘బద్రినాథ్‌’ విడుదలకు కర్ణాటకలో ఆటంకాలు ఏర్పడ్డాయి. సినిమా విడుదలను నిలిపి వేయాలని ఒక ప్రముఖ కన్నడ నిర్మాత న్యాయస్థానాన్ని ఆశ్రయించి స్టే తెచ్చుకున్నారు. ఈ విషయం బుధవారం వెలుగు చూడటంతో తెలుగు సినీ ప్రేక్షకులు సహా మెగాస్టార్‌ అభిమానులు తీవ్రనిరాశకు గురయ్యారు. బద్రినాథ్‌ పంపిణీ హక్కులు తనకు ఇస్తామని మాట ఇచ్చారని, తన దగ్గర కొన్ని లక్షలు తీసుకున్నారని బెంగళూరుకు చెందిన మరో నిర్మాత ఆరోపిస్తున్నారు. సినిమా విడుదలపై వివాదం ఏర్పడటంతో ఇప్పటికే బెంగళూరు నగరం సహా కర్ణాటకలో బద్రినాథ్‌ ప్రదర్శనకు హక్కులు తీసుకున్న థియేటర్‌ యజమానులు హడలిపోతున్నారు.

కాగా బుధవారం గీతా ఆర్ట్‌‌సకు చెందిన ప్రతినిధులు బెంగళూరుకు వచ్చి, ఫిలింఛాంబర్‌కు చేరుకుని కర్ణాటక చలన చిత్ర వాణిజ్య మండలి అధ్యక్షుడు బసంత్‌ కుమార్‌ పాటిల్‌, ప్రముఖ నిర్మాత సా.రా. గోవిందు తదితరులతో మంతనాలు సాగించారు. కోర్టు నుంచి స్టే తెచ్చుకున్న నిర్మాతను కర్ణాటక చలన చిత్ర వాణిజ్య మండలి కార్యాలయానికి పిలిపించి చర్చలు జరపడానికి ప్రయత్నించారు. అయితే ఆయన అందుబాటులో లేకపోవడంతో గురువారం చర్చిస్తామని ఫిలిం ఛాంబర్‌ ప్రతినిధులు చెప్పడంతో గీతా ఆర్ట్‌‌స ప్రతినిధులు వెనుదిరిగారని సమాచారం. బెంగళూరుకు చెందిన డిస్ట్రిబ్యూటర్లకు సినిమా పంపిణీ హక్కులు ఇవ్వకుండా స్వయంగా గీతా ఆర్ట్‌‌స సంస్థ విడుదల చేస్తున్నందున ఈ సమస్య వచ్చిందని సినీ వర్గాలు అంటున్నాయి.

చర్చలు ఫలించకపోవడంతో గురువారం ఉదయం నుండి ఫిలింఛాంబర్‌లో చర్చలు జరుపుతున్నారు. ఎట్టకేలకు సినిమా విడుదలకు ప్రయత్నాలు మమ్మురం చేస్తున్నారు. కర్నాటకలో ఎన్నడూ లేని విధంగా పబ్లిసిటీి కూడా భారీగానే ఇచ్చారు. ఈ చిత్రాన్ని తెలుగు, కన్నడంతో సహా తమిళ, మళయాళ బాషల్లో ఒకేసారి విడుదల చేయాలని సన్నాహాలు చేసారు.అయితే ‘మావీరన్‌’ (మగధీర తమిళ డబ్బింగ్‌ చిత్రం) తమిళంలో కనీస స్థాయిలో కూడా ప్రభావాన్ని చూపలేకపోవడాన్ని దృష్టిలో ఉంచుకుని ‘బద్రినాధ్‌’ తమిళ అనువాదాన్ని వాయిదా వేస్తున్నారు. కనుక మళయాళ, తెలుగు వెర్షన్స్‌ మాత్రం విడుదల అయిపోతాయి.